Judiciary, executive leh force-te Thawhho ṭhat a ṭul - High Court Judge

Gauhati High Court judge Justice Marli Vankung, Champhai Judicial district portfolio judge ni bawk chuan nimin khan Champhai District Court a tlawh a, judiciary, executive leh force-te inkarah thawhhona ṭha a awm a ṭul thu a sawi.

Justice Marli Vankung chuan, judiciary, executive leh force-te an thawhho ṭhat a ṭul thu sawiin, "Heng zinga pakhat pawh a chak loh chuan a pumin a chak lo dawn a, inpawhtlang takin harsatna awmte sawihoa chinfel dan ngaihtuahho ṭhin a ṭul," a ti.

Champhai Judicial District-ah pawikhawihna thleng a tam avang leh pawikhawihna lian tham tak tak a awm nual avangin chak zawka hmalaka chinfel a ngaih thu leh, jail dinhmun leh a chhunga awmte hriselna leh an dinhmunte ngaihven a ṭul thu Marli Vankung chuan a sawi bawk.

Justice Marli Vankung hian Champhai District Court hmunhma leh hnathawh dan leh Juvenile Justice Board leh District Legal Services Authority-te hnathawh dan leh hmasawnna ruhrel siamte a endik a; chak zawka thubuai chinfel a nih theih nan hmalak ṭulte judicial officer-te a sawipui bawk a ni.

Gauhati High Court Judge hi Champhai DC James Lalrinchhana leh SP Lalrinpuia Varte hoin official-te'n lo dawngsawngin, Aizawl aṭangin joint registrar (judicial) Gracy L Bawitlung, Law & Judicial joint secretary Melody Lalrochampuii leh court officer Kaizamang Thangeo ten an ṭawiawm.