MNF unit-te'n SEDP dawng turte an thlang - ZPM Ṭhalai

ZPM Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkar flagship programme, Socio Economic Development Programme (SEDP) dawng turte MNF unit-te'n an thlang tih an sawi.

ZPM Ṭhalai president Malsawmzuala Ralte chuan, MNF unit-te'n SEDP dilna form/format an pe chhuak leh a dawngtu tur an thlang chuan Zoram mipui a barakhaih thu sawiin, "SEDP atan hian kum 2022-23 atan cheng vbc. 700 dah a ni. Sum hi MNF party sum a ni lo a, state budget-a mi, mipui sum ngei a nih avangin intithu taka party fund ang maia ruling party unit-te'n an hman hi a rem lo," a ti.

SEDP chungchanga MNF thil tih dan chu democracy rama thil thleng atana mawi lo leh democrary rahbehna a nih thu sawiin Malsawmzuala Ralte chuan, "MNF unit-te'n SEDP dawng tur an thlang a, dilna form-te an lo pe chhuak a nih chuan SEDP hi mipui sum aṭanga sem loin, an party sum aṭanga sem turin kan phût," a ti a, budget chu mipui ta a nih avangin tih bik neih a thian loh thu a sawi.

ZPM Ṭhalai President chuan, Chief Minister-in SEDP dawngtu thlangtu tur chu MNF unit an nih thu a sawi nia tarlangin, "Hei hian MNF hi huapzo sorkar an nih lohzia a tilang chiang hle. State khata sorkar hotu berin a sawi àwm loh tak a sawi a ni. Congress sorkar aṭang tawhin sorkar sum hi party sum ang maia hman a, thlauhthlâk bik neih fo hian hmasawnna kawngah min tihnufûm a, sim a hun tawh a ni," a ti.