Zoram chhanchhuak turin kei ni lo hi mipuiin rin an nei lo niin ka hria - Lalsawta

Mizoram Pradesh Congress Committee (MPCC) president Lalsawta chuan, Mizoram chhan chhuak turin Congress party lo chu mipuiin rin an nei loa a hriat thu a sawi.

Lalsawta hian nimina Congress Bhawan-a MPCC inkhawmah thu sawiin, Congress party-ah danglamna nasa tak a thleng niin a sawi a, "Sawi loh anga nung loin, kan nun danin i tlangau ang u. Thingtlanga kan unaute, kan unit leh block-te rinawm takin, chhel takin ram tan nghet takin an ding tih hria ila. Keini lo hi Zoram chhan chhuak turin mipuiin rin an nei lo niin ka hria," a ti.

Congress party-ah dang­lamna thleng avangin mipuiin beiseina an nei sang zel nia sawiin Lalsawta chuan, "Keini ho hi mipui rin leh innghahna kan nih zel a ngai. Kan ram hi a chhiat zel lohna turin keini hi dik tak leh chhel taka kan thawh ṭâng ṭâng a ngai a ni. Keini lo hi Zoram chhan chhuak turin mipuiin rin an nei lo niin ka hria," a ti a, inpe lehzual turin an party mite a fuih.

Congress party President chuan MLA candidate chung­chang sawiin, bial tam takah an mite'n phûr takin anmahni ngaihsaktu bik neih an duh tih a sawi a, "Mizoram tan politics ṭha leh dik inzirtir kan mamawh avang leh Congress party chu committee hmanga kal kan nih avangin committee thu anga bial vil leh vil loh chungchang rêl a ni. A hun takah Mizoram leh bial tana mi ṭha Pathianin min pe ang, hei hi kan ring ngam a ni," a ti.