Hmeichhia leh naupang himna dan zirho

SIRDPR leh Kolasib District Child Protection Unit chuan, nimin khan Kolasib-a SIRDPR Extension Training Centre-ah hmeichhia leh naupang kaihhnawih dan hrang hrang zirhona an buatsaih a, minister of state K Lalrinliana'n a hawng.

LAD minister K Lalrinliana chuan, dan lalna hmun apiangah hmasawnna a chak ṭhin tih sawiin, "Dan hi mipui tan siam a nih angin, hlawhtling tur chuan dan hnuaia kan chanvo kan hriat hi mi tin mawhphurhna pawimawh tak a ni. Dan hnuaia mahni dikna chanvo hriatna chuan huaisenna a pian chhuahtir ṭhin," a ti.

K Lalrinliana chuan, hmeichhia leh naupangte himna tur leh dan hmaa thiam an channa turin a kaihhnawih dante hriat a ṭul thu a sawi a; dan hriat lohna chu thiam chan nan chhuanlam a tlin loh thu leh, khawtlang leh in chhung khura hmeichhia leh naupangte dinhmun rahbeh a nih loh nan uar zawka inzirtirna kalpui a pawimawh thu a sawi bawk.

Zirhonaah hian Kolasib-a Fast Track Court judge Julie Lalrinzami, chief judicial magistrate Vincent Lalrokima, civil judge cum judicial magistrate Cacy Malsawmtluangi Ralte, district child protection officer Dr David Zaitinvawra leh ETC faculty T Lalchhandami ten hmeichhia leh naupang kaihhnawih dan chi hrang hrang an sawifiah a; hmeichhia leh naupang enkawlnaa mawhphurna nei sorkar department aiawh te, One Stop Centre-a thawk te, zirtirtu pawl leh tlawmngai pawl aiawhte leh home enkawltute an tel a ni.