PC sorkartirtu mipui chungah lawmthu sawi

PC party president Lalhmangaiha Sailo leh hruaitu dangte chuan nimin khan Mizoram Legislative Assembly golden jubilee puala Assembly Annexe-a buatsaih Exibition an tlawh a; PC party-in ram kaihruai tura hun remchang an lo nei ve tawh chu lawmawm a tih thu sawiin, PC party sorkartirtu Zoram mipui chungah lawmthu a sawi.

Lalhmangaiha Sailo chuan, kumin May 10-a Mizoram Legislative Assembly-in kum 50 a tlin champhaphaka special session neih a ni chu ropui a tih thu sawiin, “Assembly House rorelna kalpui dan leh inkaihhruaina dan felfai leh zahawm tak kan nei hi state dangte pawn entawn tlakah an nei hialte hi a lawmawmin a chhuanawm tak zet. PC party-in term hnih dawn lai rorelna fawng a chelh ve tawh a, ram kaihruai tura hun remchang a nei ve thei kha a vote tling tu Zoram mipui chungah ka lawm a ni,” a ti.

PC President chuan, an party dintu Brig. T Sailo-in Assembly-a a hun tàwp lama a thuchah sawiin, “Zoram mipui aiawh tura thlan tlin MLA-te hi eng party pawh ni ula, Mizoram hmasawnna hi âtchilh berah lo nei ṭhin ang che u, tih te, kan ram hmasawnna dâltu ber chu hlemhlêtna a ni a, chuvangin he House hi hlemhlêtna dona hmunpui berah lo nei ṭhin ang che u, tihte a ni,” a ti a; rinawmna, dikna, taimakna leh tlawmngaihna vawn nun zelna kawngah House-a member-te chu hma hruaituah ṭang ṭhin tura a chah thu a sawi bawk.