MIZOFED-in inkhawmpui an hmang

Mizoram State Cooperative Marketing & Consumers Federation (MIZOFED) chuan nimin khan Synod Conference Centre-ah inkhawmpui vawi 24-na an hmang a, Cooperation minister C Lalrinsanga leh K Laldawngliana, MLA-te’n an hmanpui.

Cooperation Minister chuan, cooperative movement chu movement pawimawh, Kristian nun nena inrem em em a nih thu sawiin, “Isua vana a lâwn hnuah zirtirte leh ringtu hmasa berte khan cooperative movement hlimthla an lo entir tawh. Cooperative movement hi a rau dik taka kalpui chuan kan ram economy hian hma a sawnpui dawn tih a chiang,” a ti.

Mahni chauha tih theih loh thil tam tak chu mi dangte nena thawhhona hmangin tih theih a ni tih sawiin C Lalrinsanga chuan, “Hlawhtling tak tak tur chuan rinawmna a pawimawh,” a ti a; cooperative movement hruaitu atan Kristianna hman ni se, tun aiin nasain Mizoramin hma a sawnpui tur thu a sawi.

MIZOFED hian ṭhuang thumin sumdawnna an kalpui a, POL division, LPG division leh Essential & Consumer (EC) division-te an ni. Kum 2021-22 chhung khan POL division-in cheng nuai 17363.69 man, LPG division-in nuai 4108.54 man leh EC division-in nuai 1793.96 man bungrua an hralh a ni.