KHAWTHLIR
Thisen pe
Central Reserved Police Force (CRPF) 225 Battalion, Zemabawk chuan nimin khan an hmunah thisen pek rûnpui an huaihawt a, Civil Hospital, Aizawl tan thisen unit 63 an pe. 225 CRPF hian kum liam ta chhung khan thisen unit 76 an pe a, pawl hminga thisen pe ṭha chawimawina an dawng a ni.
Hnathawh endik
Mizoram Legislative Assembly-a Public Accounts Committee chuan Auditor & Accountant General of India Report 2016-17 behchhanin nimin khan Phaibâwkkâwn, Selinga PHE department-in water supply scheme siam hna an thawhna hmun an tlawh. Tui lakna hi Rs 51,00,000 sênga siam a ni.
Khawl thar hawng
MzSRLM bultuma Suangpuilawna self help group-te thar - sapthei, lakhuihthei leh nimbu tui sâwrna tur khawl, 'Lawntlang Juice Extraction Centre' siam thar chu nimin khan Assembly speaker Lalrinliana Sailo leh Rural Development minister Lalruatkima ten an hawng.
Supply Centre
Sorkar laipui scheme Anna Yojana hmalakna kal zelah Lunglei South bialtu MLA Dr K Pachhunga chuan nimin khan Ṭawipui South Supply Centre a hawng. Sypply Centre hi NABARD Warehousing Scheme kaltlangin Rs 1,31,20,000 sênga sak a ni.
Dy CEM-in kâwm
MADC deputy chief executive member HC Lalmalsawma Zasai chuan nimin khan Siaha khawpuia bank-a thawktute a pisaah a kâwm. Bank-in harsatna hrang hrang an tawh te, MADC-te'n bank an chhawr ṭangkaina tur leh bank lamin an staff leh customer-te tana an ṭangkai theihna tur kawng hrang hrangte an sawiho a ni.
Apple chîn zirho
Mizoram Science, Technology & Innovation Council chuan an thawhpui CSIR-Institute of Himalayan Bioresource Technology, Palampur leh College of Horticulture, Thenzawl-te nen thlai/hnimhnah rimtui (aromatic plants) leh apple chîn dan leh a enkawl dan zirhona nimin khan an buatsaih.
IDCF sawiho
Intensified Diarrhoea Control Fortnight (IDCF) 2022 Lunglei District Steering Committee chu nimin khan bawrhsap Kulothungan A kaihhruaiin a pisaah an ṭhu. Lunglei district SDC/CHC/PHC/MC-ah naupang kum 5 hnuai lam mi 14,655 hnenah ORS packet 60,000 leh Zinc mûm 70,000 pek tura ruahman a nih thu tarlan a ni.
Thuthlung ziak
District Council & Minority Affairs (DCMA) minister R Lalzirliana pisaah nimin khan DCMA department leh North East Consultancy Services (NECS)-te'n inremna, Deed of Agreement an ziak. 'NECS hian DCMA department hnuaiah PMJVK scheme kaltlangin detailed project report leh concept note siam hna an thawk dawn a ni.