Myanmar mipui ṭanpuina tur sum Cheng nuai 90 Mizoramah a bo

Myanmar sipaite'n mipui sorkar thuneihna an hnehchhuh hnua Parliament elected member bàn tâkte'n an din, National Unity Government (NUG) hnena khawvel hmun hrang hrang aṭanga Myanmar mipui ṭanpuina tur sum thawh khawm zinga cheng nuai 90 chu Mizoramah a bo.

Sahimna zawnga Kum 2021-a Myanmar aṭanga Mizorama rawn lut U Aungthang, Chin state-a Mindat district MLA hlui chuan nimin khan Aizawl Press Club-ah thuthar thehdarhtute a kâwm a; Myanmar mipui ṭanpuina tur sum cheng nuai 90 chu Mizoramah a bo thu a sawi a ni.

U Aungthang sawi danin, NUG kaltlanga ṭanpuina a dawnte chu bank-a dah turin Myanmar-ah bank account a hmang thei rih lo a, Mizoramah pawh India khua leh tui a nih loh avangin bank account a nei thei lo a; chuvang chuan NUG hnena ṭanpuina a hnena lutte chu Mizorama bank kaltlanga dawng turin mi bank account a hmang hawh a, bank account a hman hawh aṭang chuan cheng nuai 90 a bo a ni.

U Aungthang chuan, bank account an hmansak chu Myanmar aṭanga kum 20 liam ta vela Mizorama lut, India khua leh tui nihna nei a nih thu sawiin, "Kan hmelhriatte kaltlangin Ramhluna LRM hospital bula awm Mangliana bank account-ah kan dah a, India pawisaa cheng nuai 90 chu Mangliana bank account aṭang hian a bo a, tunah chuan Mangliana awmna chin kan hre lo," a ti a, theihtawp chhuaha hmuh kîr leh dan an zawn thu a sawi.

Myanmar ráltlânte Mizoram mipui leh sorkarin an lo dawnsawn danah a lawm thu leh Myanmar ramah mipui rorelna sorkar a din theih nan theihtawp chhuahpui tura Mizoram mipui a duh thu Aungthang chuan a sawi bawk.