LC hmang tur tan AMC phalna lâk hmasak a ngai - Aizawl Mayor

Aizawl mayor Lalrinenga Sailo chuan, local council-te chu Aizawl Municipal Corporation (AMC) hnuaia awm a nih thu sawiin, department dangin an hmang/chhawr dawn a nih chuan AMC phalna neih hmasak a ngaih thu a sawi.

AMC chuan nimin khan Aizawla local council chairman leh secretary-te AMC Auditorium-ah ko khawmin, Aizawl khawpui hmasawnna kawnga hmalak dan tur an sawipui a; Aizawl Mayor chuan thu sawiin, “LC hi AMC hnuaia awm a ni a, chuvangin, department dangin an chhawr dawn a nih chuan AMC phalna an neih hmasak a ngai a ni,” a ti.

Lalrinenga Sailo chuan, mi changkang leh fing apiangin bawlhhlawh an ngai pawimawh tih sawiin, khawvel changkang zawkte entawnin India ram pawhin faina kawngah ke a pên mek thu a sawi.

Inkhawm hi AMC joint commissioner H Lalhmingthanga’n a kaihruai a, inlawmna thu sawitu AMC commissioner Zothanmawia chuan, LC chu Aizawl mipui tana hmalaka sûlsutu ber an nih thu leh AMC hmalaknaah an ṭangkai thu a sawi. Executive councillor (i/c Solid Waste Management) Laltlanzova Khiangte leh executive councillor (i/c Sanitation) H Zonunsanga ten thu an sawi bawk.

Inkhawmah hian AMC hmalakna leh ruahmanna chungchang te, motor parking, bawlhhlawh sâwngbàwl, leivûng paih, ran khuahkhirh leh hman khat daih sarâng (single use plastic) chungchanga AMC hmalakna leh hmachhawpte sawifiah a nih bakah, sawiho a ni.