ADB loan pûk tur zinga 90% chu Sorkar laipui rulh tur a ni - MNF MLA

Horticulture Development Board vice chairman Prof. F Lalnunmawia chuan, health care scheme hnuaia mipui hnena inenkawlna senso (bill) pek tur sorkarin a la batte rulhna atana Asian Development Board (ADB) loan cheng vbc. 1,000 pûk tum zinga a tam zawk, 90% chu sorkar laipui rulh tur a nih thu a sawi.

Prof. F Lalnunmawia hian nimin khan Mizo Hnam Runa inkhawmah thu sawiin, health care lama harsatna sutkian nan ADB aṭangin loan cheng vbc. 1,000 pûk tura tihfel a ni chu thil lawmawm tak a nih laiin, mi ṭhenkhatin hrethiam loin an sawisel niin a sawi a, “ADB loan rulh tur tam zawk 90% hi sorkar laipui rulh tur a ni a, keini state-in kan rulh tur chu 10% a ni,” a ti.

F Lalnunmawia sawi danin, ADB loan pûk tura ruahman chu cheng vbc. 1,004 a ni a, chuta ṭanga 80%, cheng vbc. 803.76 chu ADB aṭangin loan anga pûk tur niin, a bak 20%, cheng vbc. 200.94 chu state sorkar tum tur a ni thung. ADB aṭanga loan lak tur cheng vbc. 803.76 zinga 90%, cheng vbc. 723 chu sorkar laipui rulh tur a ni a, Mizoram sorkarin 10%, cheng vbc. 80 a rûl dawn a ni.