BJP-in central scheme Agnipath sawifiah

BJP, Mizoram Pradesh ṭhalai, Mizoram State Yuva Morcha hruaitute chuan nimin khan Aizawl Press Club-ah thuthar thehdarhtute an kâwm a; sorkar laipuiin ṭhalaite tana scheme duhawm tak Agnipath a siam thar thu an sawi.

Mizoram Pradesh Yuva Morcha president Lalramdinliana chuan, prime minister Narendra Modi-a’n June 15, 2022 khan Agnipath a puan thu a sawi a, “A hnuaia ṭhalai thlante chu Agniveers tia koh tur an ni. Agnipath hian ram leh hnam hmangaiha ram tana pên chhuak duh tak tak, kum li chhung Armed Forces-a thawhna tur a ruahmansak dawn a ni,” a ti.

Lalramdinliana chuan, Agnipath scheme chuan Armed Forces chu ṭhalai tam tak, thothâng ṭha tak zia a neih thar lehna turin hma a la dawn tih sawiin, “Scheme hian ram leh hnam tana ṭhalaite tan sipai uniform mawi tak maia hà a, tunlai thiamna leh changkanna zûlzuia hlâwk leh ṭangkai thei tur ang bera chhawrna tur a ruahman dawn a ni,” a ti a; ruahmanna chu PM Modi kaihhruai sorkarin ṭhalaite tana hna tam lehzual siam kawnga hma a lak ṭhatzia a tihlan thu a sawi.

BJP Yuva Morcha President sawi danin, kuminah Agniveers 46,000 lak tum a ni a, kum 17-23 inkar lâk an ni ang. Kum khatnaah cheng nuai 4.76 leh kum linaah cheng nuai 6.92 vel an la thei dawn a, ei leh in leh thawmhnaw a thlawna pek vek tur a ni.