Ni 5 chhung hripui vanga thi awm tawh lo

June 16, Ningani khan Mizoramah Covid-19 vei mi 19 hmuh chhuah a ni a, positivity rate 6.71% niin, a hma ní aiin a tlahniam. Nimin khan hripui vei dam tawh mi 34 chhuahtir an ni a, Covid-19 positive thi an awm lo a, ni nga chhung thi an awm tawh lo.

Ningania Covid-19 positive hmuh chhuahte chu mipa pariat leh hmeichhia 11 an ni a, Rapid Antigen Test hmanga hmuh chhuah vek a ni.

IDSP record angin, Mizoramah Covid-19 vei 2,28,687 hmuh chhuah a ni tawh a, mipa 1,06,468 leh hmeichhia 1,22,219 an ni a, mipa aiin hmeichhia 15,751-in an tam zawk. Nimin tlai dar 5 thleng khan mi 2,27,853 (99.64%) chhuahtir an ni tawh a, mi 701 (0.31%) thi tawhin, enkawl mek mi 133 (0.05%) an awm.

Mizoramah a záwnin ni nga chhung Covid-19 vanga thi an awm tawh lo a, June thla bikah mi pathum an thi tawh. Thi an awm hnuhnun ber ṭum chu June 12, 2022 a ni.

Nimin tlai dinhmun angin, Mizorama district 11 zingah Covid-19 positive awm tawh rih lohna district pali - Siaha, Serchhip, Lawngtlai leh Hnahthial district-te a awm a; positive tamna ber Aizawl district-ah mi 44 awmin, Kolasib district-ah mi 32 leh Mamit district-ah mi 29 an awm.