Arsenal player thar tur Fabio Vieira!

Patrick Vieira kha Arsenal captain ropui berte zinga mi a ni. Tunah Vieira an nei leh dawn, an player thar tur hmingpum erawh Fábio Vieira a ni ta thung - season nga chhung atan contract a ziak ang.

Gunners hian pound maktaduai 30 sengin an lalut dawn a, a man hi la pung leh thei tur a ni. Kum 22 mi chauh la ni mah se Vieira hian Porto tan Primeira Liga nomawi vawi hnih a chawi tawh a, tawnhriat a nei ṭha thawkhat hle.

Portugal rama football inelna sang berah, season liam ta khan match 15 bul ṭanin ṭum 12 chu bench aṭangin a lut. Goal ruk khungin a ṭhiante khung tur vawi 14 a siamsak, attacking midfielder hna thawh atan chuan a ṭha thawkhat viau.

Khawthlang media ten an tarlan dan chuan, nimin khan medical test a nei a, chanchinbu i chhiar meuh chuan Arsenal jersey a pawt parh hman tawh hial mai thei a ni.

Arsenal hian tun nipui bazar chhungin Marquinhos an lo lalut tawh bawk. Tunah hian Manchester City striker Gabriel Jesus leh Leicester City midfielder Youri Tielemans te an la rim mek bawk.