Hmanraw lak khawmna senso a tam; Tihhniam theih kan beisei - Lalsawta

Planning minister Lalsawta chuan, sorkar leh mipui mamawh bungrua, hmanrua leh thil ṭul dang lak khawmna (procurement) atan Mizoram sorkarin kum tin cheng vbc. 2000 vel a hman ṭhin thu a sawi.

Mizoram sorkar leh United Nations Development Programme (UNDP)ṭang­kawpin an buatsaih, Procurement Handbook for Goods, Services and Civil Works zirhona, Secretariat conference hall-a neih a hmanpuinaah thu sawiin Lalsawta chuan, "Mi thiamte'n an chhût danin, kum tin cheng vbc. 2000 zet procurement atan a kal ral ṭhin a ni," a ti.

Planning Minister sawi danin, procure­ment atana senso a tam avangin fimkhur leh awmze nei zawka hman a nih chuan sum tam tham tak mipui tan humhim theih beisei a ni a, UNDP-a mithiamte rawih a ni. UNDP han Mizoram sorkar inrêlbàwl dan an zir chian hnuah, Procurement Handbook an tichhuak a ni.

UNDP mithiamte hian GFR 2017 te, New Procurement Framework of World Bank te, UN Procurement Procedures-te leh Ministry of Finance and Incoterms 2010 buatsaih Policies & Procedures-te pawh lehkhabu buatsaihna atan an ráwn a ni.

Lalsawta chuan, procurement chu sorkar inrêlbâwlnaa thil pawimawh berte zinga mi a nih thu sawiin, "Thil lei chungchangah langtlang, hlâwk leh felfai zawka kalpui a nih theih nan Mizoram mila inkaihhruaina changtlung tak buatsaih a ni ta hi thil chhinchhiahtlak leh ṭangkai tak a nih ngei ka beisei a ni," a ti.

Government procurement tidanglam a, kalphung ṭha zawk la lut tura hun rei tak an lo nghah tawh chu a takin a thleng dawn nia a ngaih thu sawiin Planning Minister chuan, "Sorkar laipui General Financial Rules 2017 dah tel a nih bakah, July 1, 2017-a hman tan tur Goods and Services Tax Act nen pawh inhmeh tak tur a ni," a ti a; lehkhabu chu NEDP Core Committee hmaah pharh a nih tur thu a sawi.

Inkhawm hi Planning secretary Dr C Van­lalramsanga'n a kaihruai a; UNDP pro­curement expert Krishan Batra-a'n lehkhabu kalphung a sawifiah a, zawhna leh chhanna hun hman chhunzawm a ni.