Champhai DVO pisa kai tur dan a ni

Champhaia bawng vulhtute chuan, December 2015 aṭanga May 2016 chhunga bawnghnute man an lak theih loh avangin nimin khan an bawnghnute leisaktu CHAMUL managing director, Champhaia AH & Vety officer ni bawk Lal­chungnunga Pudaite chu a pisa kai tur an dang.

Bawng vulhtute sawi danin, an bawnghnute man an lak theih loh vanga an mangangin March 27, 2017-ah hmalak an lo tum tawh a, Aizawl aṭanga kal AH&Vety Joint Director leh Deputy Director-te nen an inbiak hnuah, an ngenna angin March 29 thleng an nghak a ni.

March 29-ah AH & Vety hotute ngenna vangin April 3 thleng CHAMUL chu an nghal leh a, mahse an hun tiam a ral hnuah, tun thlenga bawnghnute man an dawn tâk loh avang leh, a mawhphurtu ber CHAMUL Managing Director sawn chhuah tum a nih avangin a pisa kai tur an dang ta a ni.

Bawng vulhtute chuan, rim taka an thawh chhuah sa CHAMUL-in an leina pawisa an hmuh hma loh chuan CHAMUL Managing Director (DVO) pisa kai tur dan an tum thu an sawi a; Champhai chhuahsan lo tura dan an tum bawk.

DVO Lalchungnunga Pudaite thlaktu tura tih M Zohmingthangi pawh an bawnghnute man chungchanga an harsatnaah mawh a phur ngam dawn a nih loh chuan, DVO mawhphurna la rih lo tura an duh thu an tarlang a ni.

Bawng vulhtute chuan, bawnghnute man an dawn theih loh avangin harsatna tam tak an tâwk tih sawiin, ṭhen­khat chuan bawng an vulh thei tawh lo a, an tihral phah niin an sawi.