SEDP-ah cheng vbc. 1000 kan dah dawn - Dr R Lalthangliana

MNF vice president Dr R Lalthangliana chuan, MNF policy thar Socio Economic Development Programme (SEDP) chu NLUP anga sorkar hna­thawkte nékchêp zawnga buatsaih a nih loh tur thu leh, an sorkar hunah SEDP-ah cheng vbc. 1000 an dah dawn thu a sawi.

Dr R Lalthangliana hian nimin khan Mamita Siamliana Hall-ah MNF Mamit Block buatsaih, SEDP zirhona leh political training-ah thu sawiin, "SEDP-ah chuan sorkar hnathawkte'n phûr taka an tih tur kan dah dawn a, sorkar department-te kan rawk ve lo ang. An thawh tur hlirin a khat zawk ang a, NLUP anga an tih tur lak zawhsak vek ang kha a awm ve lo," a ti.

MNF sorkar huna budget session neih hmasak berah SEDP head a lang nghal dawn nia sawiin, Dr Thangtea chuan, "Hemi atana sum kan dah tur zat pawh cheng vbc. 1000 a chuang ang," a ti. Sorkar tûka NLUP sem tiam a, kum hnih hnua bul ṭan chauh angin SEDP chu an buatsaih lo nia sawiin, minister leh official-te'n office dawhkân an ṭhut­chilh ruala an thawh tur an peih vek tawh niin a sawi.

Dr R Lalthangliana chuan, sorkar hnathawk awm lohna chhungkua leh corporation hnuaia thawk awm lohna chhungkuaa lehkhathiamte chhawm­dawlna tur SEDP-ah rua­hman a nih thu a sawi bawk.

MNF Vice President chuan, inthlan dawna hun teptèr leh bichilh taka candidate puan chu a buaithlak tih sawiin, an hotute'n ngaihtuahna thar an nei tih a sawi a, "Kum 2018 inthlanpuiah kan candidate turte'n official-a puan an nih hma pawhin, campaign-na hun thâwl ṭha an neih theih nan ruahmanna kan nei turah ka ngai," a ti.

Sikul kai hun chu Mizo hnam leh nunphung mila enṭ hat an tum tih sawiin, "Zu zawrhna dan hman mek, MLPC Act hi kan titawp dawn bawk," a ti.

MNF thuchhuah chuan, nimina Siamliana in­khawm­ah hian Dr R Lalthangliana'n MNF zawm thar voter 129 a lawm lut niin a tarlang.