KHAWTHLIR

Gas bur 39 man
Mizoram Consumers’ Union (MCU), Sakawr-dai branch hruaitute chuan April 4, 2017 khan Sakawrdai RGGLV distributor-a sem tur gas phur truck, MZ-01 C-2746-ah gas bûr 306 a phurhte chu an bûk a, bûr 39 chu a nih tur ang a tlin loh nasat avangin an man. Gas bûr man chungchang hi Sakawrdai Civil SDO hnena an thlen bakah, police-ah FIR an thehlut a; police-te chuan driver M Singha chu an man nghal bawk.

Hmalak dan tur sawiho
Minor Irigation secretary H Lalengmawia chuan, Thawhlehni khan Minor Irrigation department officer-te ko khawmin, department hnathawhte a sawipui a; kalphung pangngai bakah, thil thar, mipui tana ṭangkai tur ngaihtuah chhuak ṭhin turin a chah bakah, hmalak zel dan tur an sawiho a ni.

Tlân phal lo
Traffic SP chuan thupek chhuahin, Vaivakawn Bazar - Chawnpui via Upper Kanan kawngpui chu PWD-in an siamṭhat dawn avangin, zing dar 9 aṭanga tlai dar 5 thleng, hna thawh zawh a nih hma chuan lirthei tlân phal a nih dawn loh thu a tarlang.

In pathum kâng
Thawhlehni zan zanlai vel khan Vaivakawn Vengthlang (Zohnuai)-ah kângmei a chhuak a, in leh bungrua eng emaw zat a kang chhia. Thu dawn danin, kângmei hi chhungkaw pathum luah lai, Lalmana in
aṭanga chhuak a ni a, an ṭhenawma AV Duha in leh Khawtinthanga te in a kâng kai a, inte chu a kan ral hmain ṭhelh mih a ni. In bâkah, car leh scooter a kang chhe viau bawk.

Tla hlum
Nimin chhun dar 11:30 vel khan Kawlliansanga Sailung, Champhai Electric Veng chu electric siam tura electric bana a lawn laiin a tla a, Champhai District Hospital-ah lak a ni. A hliam nat vanga Champhai aṭanga Aizawl panpui a nih laiin kawng lakah nimin tlai khan a hliam tuar loin a thi.