Chief Minister hoin solar power sawiho
Relyon Solar Power Private Ltd. hotute chuan, nimin khan CMO conference hall-ah chief minister Lal Thanhawla an kâwm a; Mizorama ni zung (solar) hmanga kawlphetha siam chhuak tura ruahmanna an duan chhinte an sawipui.
Chief Minister chuan, ni zung hmanga kawlphetha siam chhuah chu kawlphethaa intodelh lo Mizoram state tan thil ṭangkai leh ṭha tak nia a hriat thu a sawi a, "Ni zung hmanga kawlphetha siam hi sorkarin a ngai pawimawh a, chuvangin, tun hnaiah Solar Power Policy-te hman theih turin chhawpchhuah a ni," a ti.
Khawvel boruak chhe mek leh sik leh sá inthlak danglam nasaah solar power chu kawlphetha thianghlim ‘clean power’ a nih thu sawiin Lal Thanhawla chuan, "Solar power hian ngaih pawimawh a hlawh hle," a ti a; a man sang leh kawlphetha khawlna battery technology hman chu thil buaithlak a nih thu a sawi.
Relyon Solar Power Private hotute chuan, Mizorama solar power siam chhuak tura ruahmanna an neihte a lem nen an sawifiah. Anni hian anmahni sensoin megawatt 40 pe chhuak thei tur solar energy Mizoramah bun an duh a, in chunga solar energy khawl bun leh ni chakna hmanga tui pump-te pawh tih an inhuam a ni.
Chief Minister chuan Power & Electricty department hotute chu Relyon Solar Power Private-in ruahmanna an neihte zir chiang turin a hriattir nghal a ni.
CM Lal Thanhawla hi minister Lal Thanzara, CM principal secretary Lalram Thanga, Power & Electricity secretary H Lalengmawia leh P&E engineer-in-chief L Pachuau ten an ṭawiawm.