Greenwood Hospital-in Silver jubilee an lawm

Aizawla mimal enkawl damdawi-in hmasa ber, Greenwood Hospital, Aizawl chuan nimin khan an kum 25 tlin, silver jubilee Tourist Lodge, Chaltlangah an lawm a, chief minister Lal Thanhawla leh Health minister Lal Thanhawla ten an hmanpui.

CM Lal Thanhawla chuan, Green­wood Hospital dintu Dr Lalbuat­saiha te nupa tumruhna, taimakna leh inpekna fakawm a tih thu sawiin, Greenwood Hospital chuan mite tan damna a pek bakah, kum 25 chhungin mi tam tak tak eizawnna a siamsak tih a sawi a, "Mimal damdawi-in eng emaw zat kan nei tawh a, hriselna lamah kan changtlung zel hi a lawmawm a, Mizote tan malsawmna chi khat niin ka hria," a ti.

Chief Minister chuan, private hospital-te chu mipuiin an chhawr ṭangkai hle tih a sawi rualin, faina leh thianghlimna leh bawlhhlawh sawngbawlna kawnga an hmalak dante ngaituah zui ṭula a hriat thu a sawi a; Mizo mipuiin hriselna an ngaih pawimawh a, hriselna tichhe thei laka fihlim a ṭul thu a sawi bawk.

Health minister Lal Thanzara pawhin thu sawiin, kum 25 chhung Green­wood Hospital a kal tawh chhung­a damlote'n an chhawr ṭangkai chu hlui a tih thu a sawi.

Greenwood Hospital hi February 1992-ah din a ni a, a tirah khum 20-a bul ṭan niin, tunah khum 82 an nei mek a, thawktu 130 an awm mek a ni.