Hmeichhe aiawha thlante tan training buatsaih

Panchayat Mahila Shakti Abhiyan (PMSA), Mizoram leh State Institute of Rural Development and Panchayati Raj (SIRD) ṭangkawp chuan, nimin khan IPR directorate auditorium-ah 'Elected Women Representatives’ tih thupui hmangin leadership training an buatsaih a; RD minister R Lalzirliana'n a hmanpui.

R Lalzirliana chuan, India ramah hmeichhiate chawikanna turin nasa taka hmalak a nih thu sawiin, "Kawng tinreng­ah hmeichhiate tel ve theihna tur, thu an neih ve phâkna turin dante siam zel a ni. Ram inrêlbàwlna fawng chelhtu zingah hmeichhiate tel ngei ngei tura ruahmanna siam a ni hi a lawmawm hle," a ti a; women reservation hnuaia hmeichhe thlan tlinte chu inngainêp lo a, khawtlang ṭhatna leh hmasawn nana thawk turin a sáwm.

Dinhmun sangin mawhphurhna sang a keng tel tih sawiin RD Minister chuan, "Mipui rawngbawl tura thlan chhuahte chuan anmahni thlangtu mipui zah let a, an duh dan ngaihchan thiam a pawimawh. Hruai­tu chu mi rinawm leh mahni invawng uluk, hna thawh duh mi, mawhphurhna hlen zak zak mi nih a ngai. Hnathawhnaah hun harsa kan hma­chhawn pawhin puitling tak, dawhthei tak leh rilru zau tak put zel a ṭul," a ti.

Training hi PMSA president Zothankimi'n a kaihruai a; mithiamte'n thupui hrang hrang hmang­a paper an buatsaihte an zirho a ni.