BS-4 lirthei chauh register theih a ni

Lirtheiin khû (emission) a tihchhuah chungchanga Supreme Court thupek angin, Mizoramah pawh April 1, 2017 aṭang khan Bharat Stage-4 (BS-4) standard lirthei bak sorkarah registration tih phal a ni lo a, hei hi khauh taka kenkawh a nia thu dawn a ni.

April 1 aṭanga BS-4 lirthei bak Transport department-ah register theih a nih dawn loh avang hian BS-3 standard vehicle hnuai lam registration tih theih hun tawp, March 31, 2017 khan Aizawla District Transport Office (DTO)-ah lirthei ziah luh nasa takin a pung a, March 31-ah hian lirthei 351 register a ni.

Transport department hotute sawi danin, ṭum dangah chuan Aizawl DTO-ah chawh rualin ni khatah lirthei 70 vel register a ni ṭhin. March 31-ah vek hian driving licence 60 leh learner licence 100 chuang pek chhuah a ni bawk.

Bharat Stage tih hi lirtheiin khu a tihchhuah tehna chi khat a ni a; lirthei siamtu company-in hralh tura lirthei an siam reng rengin tehna hrang hrang a paltlang a ngai ṭhin.

India ramah chuan lirtheiin khu a tihchhuah tehna (emission norms) atan Bharat Stage tih hman a ni a; tun hma chuan BS-2 leh BS-3 lirtheite siam chhuah a ni ṭhin a, mipuite hriselna a ngaihtuah avangin Supreme Court chuan April 1, 2017 aṭang chuan BS-4 lirthei chauh sorkara register turin a ti a ni.