Welfare Board chhui tura tihin a chhui lo

Mizoram Building & Other Construction Welfare Board (MBOCWWB) chhui tura sorkar hotute'n an tih K Lalchhunga, IPS (Rtd.) chuan a chhui lo. MBOCWWB-a thawkte pawhin anmahni chhuitu an hriat loh thu an sawi.

Vanglaini palai zawhna chhangin commissioner of inquiry hlui K Lalchhunga chuan, MBOCWWB chu a chhui loh thu a sawi a, "Chhui tura ruatna ka dawng lo. A thuphunga an sawi bak engmah he thil ka chhui leh chhui loh turah hian hriat ka nei bik lo. Ka chhui duh lo an tam em a, min chhuitir ta lo niah ka ngai mai," a ti.

MBOCWWB chhui chungchangah hian chief minister Lal Thanhawla chuan March 2, 2017 khan MBOCWWB kalphung leh sum hman dan chhui turin K Lalchhunga ruat a nih thu thuthar thehdarhtute a hrilh a ni.

Chief Minister sawi danin, K Lalchhunga rawtna angin, amah pui turin Finance lama mithiam pek tur a ni. MBOCWWB chhui zawh a nih hunah minister of state aṭanga báng ta Lalrinmawia Ralte leh Mizoram Youth Commission chairman aṭanga báng ta T Sangkunga te dinhmun pawh ngaihtuah ṭhat tur a ni.

Hetih lai hian, MPC, MNF Ṭhalai leh PRISM-te chuan MBOCWWB chhui tura Chief Minister nuphal K Lalchhunga ruat a ni chu an duh loh thu leh an rin tawk loh thu thuchhuah siamin an lo tarlang tawh.

MBOCWWB-a thawkte chuan Vanglaini palai zawhna chhangin, an chungchang chhuitu an hriat phak ve loh thu an sawi a, "Keimahni lam chu engmah thu min la zawtfiah lo. LEIT Director hlui chu lehkha pek a ni tawh a, amah an chhui chiannaah hian engkim a chiang turah an ngai pawh a ni mai thei," an ti.