MZP-in zirlaibu awm kim lo hrethiam lo

MZP chuan thuchhuah siamin, academic session 2017-18 chu April 4, 2017-ah ṭan a nih tawh laia sikul luh ṭan tawh hnua zirlaibu lei tur a la awm kim loh vanga Mizorama zirlaite'n zirlai an la zir thei lo chu an hriatthiam loh thu an tarlang.

MZP tarlan danin, academic session 2017-18-ah Mizo medium leh English medium sikulte'n zirlaibu inang tlang vek zir a ni tawh dawn a, zirlaibu chu SCERT buatsaih a ni. SCERT-in zirlaibu chhutu tur an zawng a, a man a tlâwm avangin tualchhunga press-te'n an chhang lo a; chuvang chuan Government Press chhut turin pek a ni. Govt. Press chuan zirlaibu chhutna an neih loh avangin Genesis Press, Guwahati-a chhut turin an thawh leh chhawng a ni.

MZP chuan, sikul ṭan tawh hnua zirlaibu a kima lei tur la awm loh chhan chu zirlaibu chhutu press-in an zawh hman loh vang a ni tih an sawi a; tuna zirlaibu la awm lote chu pawl 2 English leh Mathematics, pawl 5 Hindi, pawl 6 Mathematics, pawl VII EVS, Science leh Mathematics te a ni. Pawl 8 zirlaibu chu a vaiin a la thleng lo thung.

MZP chuan, "A hun taka zirlaite'n zirlaibu an dawng thei lo ṭhin hi thuneitute inthlahdah vangah kan ngai," an ti a; zirlaite'n zirlaibu an neih theih thuaina atana hma la tur leh, school calender chu hriat lâwk ṭhin a nih avangin sikul ṭan hmaa inbuatsaih lâwk ṭhin tawh turin thuneitute an ngen a ni.