T Romana College silver jubilee lawm

T Romana College chuan an college kum 25 tlin (silver jubilee) nimin khan Vanapa Hall-ah an lawm a, minister Lal Thanzara khuallian a ni. Minister chuan, zirlaite chu chhawr tlak ni tura inzir chhuak turin a fuih.

Lal Thanzara chuan, T Romana College-in silver jubilee a thleng chu a lawmpui thu leh zirlai ṭha tak tak a chherchhuak tawh chu ropui a tih thu a sawi a, "Literacy rate sang tak, zirna ṭha tak kan neih hi Chanchinṭha vang a ni a, dinhmun sang tak kan thlen theih phah a, jubilee pawh hi Chanchinṭha vang a ni. Zirna hmasawnna atana Pu T Romana te chhungkaw hmalakna a ropui hle a ni," a ti.

Minister chuan, zirlaite chu an zirlaiah tih tak zeta ṭan la tura fuihin, "B.A, M.A te hi a nih theih mai a, mahse, chhawr tlak loh a awm theih. Chhawr tlak ni tura in inzir chhuah ngei a ngai," a ti a; zûk leh hmuama fihlîm tur leh, zirlaite'n dikna, takna, rinawmnate an mamawh pawimawh ber a ni tih hre turin a chah.

T Romana College hmasawn zelna turah tuna zirtirtu leh zirlai zawng zawngte'n mawhphurhna an nei tih sawiin, Thanzara chuan, "Theihtawp chhuah zel a ngai. Silver jubilee lawmnaah hian tawp mai lo se, tuna thlen chin aṭanga hmasawn dan tur ngaihtuah zel turin ka ngen che u. Tuna zirlaite hian kan hnua lo awm leh turte tan eng nge kan hnutchhiah dawn?" a ti.

Lal Thanzara chuan, zirlaite chu politics tui nûa inhnamhnaiwh lo tura chahin, sorkar hmalakna dodalna kawnga pawl anga thil tiha tel tura tih an nih chángin, an telna tur chi a ni em, tih ngaihtuah chiang hmasa ṭhin tur leh, T Romana College motto - 'Motto service to mankind' tihlawhtling zel turin a chah bawk.

Health Minister chuan, T Romana College-in mi dang tana malsawmna ni tura thisen an pe ṭhinte chu lawmawm a tih thu a sawi a; Mizoramah nun uluk tawk loh vanga HIV hrik pai an tam thu sawiin, zirlaite chu HIV/AIDS do kawngah an theihna apianga ṭang ve turin a sáwm a ni.

T Romana College hi kum 1992-ah din a ni a, kum 2002-ah deficit niin, kum 2007-ah sorkarah lak (provincialise) a ni. NAAC-in accredited B grade a pe mek bawk.