Sumdawngte tan GST zirna buatsaih
Taxation department chuan nimin khan Chanmari YMA Hall-ah chhiah lak dan thar, Goods & Service Taxes (GST) chungchang zirna sumdawngte tan an buatsaih a, Taxation minister Lalsawta'n a hmanpui.
Taxation Minister chuan, Mizoramin sum lak luhna ṭha a neih loh thu sawiin, "Kan sorkar hi industry lian berah a ṭang a, hei hian a pawi zawngin kan hnamah nghawng ṭha lo a nei mek. Hah taka kut hna thawh aiin hmelhriat ṭha neih a hlâwk zawkah ngaiin miin hah takin hna an thawh peih loh phah ṭhin," a ti.
Kalphung thlak a nih theihna atan sorkarin kut hnathawktute chawikanna atan New Economic Development Policy (NEDP) a siam tih sawiin Lalsawta chuan, "NEDP hian kum thum kum li lekah rah a chhuah kher lo ang," a ti a; kum 10-20 hnuah chuan Mizoram dinhmun leh rilru sûkthlêk (moral) thlengin NEDP-in a tihdanglam theih a rin thu a sawi.
Taxation Minister sawi danin, Mizoramah chuan Taxation department kaltlanga chhiah lak a tlai deuh a; chhiah lakna chu mâwlmang taka sawi dan chuan, direct leh indirect tax a ni.
Direct tax-ah chuan a changtu, a pawisa neituin a iptea a luh hnu emaw, a luh hma emaw pawhin a chanpual aṭangin a pe ṭhin a, income tax angte hi direct tax a ni. Mizoramah chuan direct tax pek a tlem. Indirect tax-ah chuan chhiah petu chu bungrua emaw, service emaw chhawr ṭangkaitu leh leitute an ni. Sumdawngte'n chhiah an chawi ve lo a, sumdawngte'n chhiah an pek chhun chu professional tax deuh chauh a ni.
Lalsawta chuan, sumdawngte chu chhiah an pe ve nia an hriatte chu anmahni dawrtu leh thil zawrh lei ṭhinte'n an bungraw leina baka chhiah an pek tlingkhawm a nih thu sawiin, "Hei hi in ta tur a ni lo a, sorkara lut tur, a leitu in a pek niin, kan treasurer-te in ni a, in lo kawl a ni. July 1, 2017 aṭang chuan sumdawngte'n chhiah in pek ve a ngai tawh dawn. Chhiah a âwl tumna leh bumna hian ram hi a tichhe thei a ni," a ti.
Seminar-ah hian Taxation department-a mithiamte'n GST chungchanga thil pawimawh hrang hrangte an sawifiah a ni.
GST hi ruahmanna hmasaah chuan April 1, 2017-a hman ṭan tura tih a ni a, mahse, tihfel ngai hrang hrangte tihfel hman a nih loh avangin July 1, 2017 aṭanga hman ṭan tura tih leh a ni.