Liandala leh Siamkima chanchin zir

Mizo Hlakungpui Mual Committee leh SCERT ṭangkawp chuan nimin khan Khawbungah hla phuah thiam Liandala leh thu ziak mi Siamkima chanchin zirchianna an buatsaih a, bialtu MLA T Sangkunga'n a hmanpui.

T Sangkunga chuan, Siamkima leh Liandala ten Mizote tana rohlu an hnutchhiah dan sawiin, an chanchin pawh ngaihnawm tham an nih thu a sawi a, "An tu leh fate thlengin mi chhuan­awm an ni," a ti.

Mizo Hlakungpui Mual Committee leh SCERT hotute chuan, Hlakungpui Muala seng luh tawhte chanchin zirchianna kalpui mêkah, Hlakungpui Mual din champha pualin Liandala hla leh Siamkima kutchhuakte chu tun ṭuma seminar-a zirchian atan an thlang a ni.

Seminar hi chawhma lamah Higher & Technical Education director R Lallianzuala'n a kaihruai a, Hrangbana College-a assistant professor Lalzuithanga buatsaih, 'Liandala hlate zirchianna' tih leh J Buana College-a assistant professor Ngurthansanga buatsaih 'Liandala hlate zirchianna' tih zirho a ni.

Chawhnu inkhawm chu PL Liandinga'n a kaihruai a; Govt. Aizawl College-a assistant professor Dr KC Vannghaka paper 'Siamkima chanchin' tih leh Champhai College-a assistant professor C Lalsiam­thanga papaer 'Siamkima thuziak zirchianna' tihte zir a ni bawk.