Complex siam tur lungphùm phúm

North Vanlaiphai khuaa Border Area Development Programme (BADP) sum hmanga Mini Sports Complex siam thar tur lungphùm chu Nilaini khan bialtu MLA Vanlalawmpuii Chawngthu-in a phúm.

Vanlalawmpuii chuan, Mizoram sorkarin ṭhalaite hmakhua ngaiin infiamna hmanga eizawnna ṭha tak an neih theihna atan hma a lak thu a sawi a, "Infiammite hlawhtlin nan theihtawp a chhuah a, a chhuah zel dawn. Phût lêt nei loa khua leh vengin hma a sawn theihna tura mimal ram petu an awm leh zel ṭhin hi Mizote kan vanneihna a ni," a ti.

Mini Sports Complex siamna atan hian North Vanlaiphai khaw mi, Lalthanmawia Sailo chuan a pa, North Vanlaiphal lal Lalnghinglova Sailo hriatrengna atan ram a pe a, BADP sum cheng nuai 14 hmangin hna thawh mek a ni.