Pawngsualtu kum 20 tang turin ti

Siaha Fast Track Court chuan kum 2012-a hmeichhe kum tling lo pawngsualtu, Lalramvela chu kum 20 chhung táng tur leh Rs. 3,000 chawi turin a hrem.

Siaha District Additional Sessions Judge Dr HTC Lalrinchhana, Fast Track Court Judge ni bawk chuan thubuaiah hian April 4, 2017 khan thutlukna a puang a; Lal­ramvela chu a pawisa chawi tur hi a pek theih loh chuan thla hnih dang tàn belh turin a ti.

Lalramvela hian Lung­lei Court-a a chungthu ngaihtuah a nih lai, January 4, 2016 aṭang khan lungawi lohna lantir nan chaw a nghei a, a chaw nghei chau chu Lunglei Civil Hospital-ah dah a ni. Damdawi-ina a awm lai hian amah vengtu police-te ram kâng ṭhelha an buai laiin a tlan bo a, chumi hnuah man leh a ni.