Rualbanlo pawngsualtu kum 10 táng dawn

Lunglei District & Sessions Court chuan rualbanlo pawngsualtu, Muni Rai chu kum 10 leh thla ruk táng tur leh Rs. 70,000 chawi turin a hrem a; Rs. 70,000 chawi tur hi a pek theih loh chuan thla ruk dang a tàn belh turin a ti bawk.

Muni Rai hian November 14, 2014 khan rilru leh pianphunga rual­banlo hmeichhe pakhat chu a pawngsuala puh a ni a, Lawngtlai Police Station-ah FIR a thehlut a ni. Police-te chuan Muni Rai chu an man nghal a, thubuai hi District &

Sessions Court-ah chauh ngaihtuah theih a nih avangin Lawngtlaiah ngaihtuah loin, Lungleiah ngaihtuah a ni.

Muni Rai hi jail-ah hun engemaw chen a tàn hnuin bail-a chhuah a ni a, Court-a a inlan hun turah inlan loin a tlanbo zui a, a nupui chuan Muni Rai chu a thi tawh anga sawiin, Court-ah death certificate pawh a thehlut a ni. Court chuan pawm loin, death certificate pe chhuaktu nia sawi chu Court-ah a ko a, death certificate pe chhuaktu chuan certificate a pek chhuah loh thu leh certificate lem leh a hming sign pawh a lem a nih thu a sawi.

Chumi hnuah Muni Rai-a nupui pawh man a ni a; Muni Rai pawh hi police-in Kolasib district-ah an man leh a ni.

Muni Rai hian a pawisa chawi tur hi a pek chuan Cr.PC Section 357 angin pawngsual tâwktu pek tura tih a ni.