Nikìr ruahsur leh khawchêng avangin Mizoram hmun ṭhen­khatah chhiatna a thleng a, Mizorama lui hrang hrangte a lian hlawm hle. Ruah la sur zui zel tura hmuh a nih avangin Mizoram sorkar chuan ni hnih chhung sikul chawlh a puang.
Khawchin thlirnaah ruah la sûr zui zel tura hmuh a nih avangin Mizoram sorkar chuan Mizorama sikul zawng zawng, pawl 12 chin hnuai lam zawngte chawlh a puang a; hemi chungchanga hriattirna hi School Education director Dr H Lalthlangliana chuan nimin khan a tichhuak a, vawiin leh naktuk Thawhlehni chawlh tur a ni.
June 18, Inrinni zing dar 4:00 vel khan Tuikhurhlua lung remna cement chhùn chimin Lalṭhuamliana in a chimpui a, ina awm mi paruk chimpui mah se, thi an awm lo.
Thu dawn danin, Lalṭhuam­liana in hi chhungkaw pahnihin an luah a, a chung ber kawngpui àn chu in neitute'n choka atan an hmang a, a hnuai lam chu mi dangin an luah thung. In chhâwng laita luahtu Darthantluanga te chhungkua leh in chung bera riak mi palite chu an tlân chhuak hman a, in chhawng hnuai bera cheng mi paruk erawh tlân chhuak hman loin, a chimpui a ni. Mi panga hliamin, damdawi-inah hruai an ni a, ngaihtuahawm erawh an ni lo. 
Lalṭhuamliana chuan, an in a chim chhan chu - an in bula kawngpui dàwlna atana Shivalaya company-in kawng thlanga cement bang an chhûn, a innghah­na rinawm loh vang a nih thu a sawi a; kawng dawlna chu a rinawm loh thu leh a hlauhawm tur thu an sawi pawhin Shivalaya duty-te'n an ngai pawimawh duh lo niin a sawi bawk.
Chhiatna thlenna hmun hi bialtu MLA R Lalzirliana'n a hmunah tlawhin, hnatlangte tan Rs 3000 a pe a, Shivalaya company chu mihring himna ngai pawimawh turin a hrilh. Zonal officer Saithangpuia Sailo, Thing­sulthliah BDO chuan tlawhin, sorkar aṭanga buaipui ngaite a bawhzui a; Zawlbuk Group YMA hruai­tute pawhin tlawhin, hnatlang ei leh in senso atan Rs 1,000 an pe a ni. 
Serchhip Zawlpui Mat phai leh a chhehvel leilet chu nimin tlai khan tuilianin a chîm pil a, he thu ziah lai hian tui a la len belh zel. Leilet leh thlám eng emaw zat a chîm pil a, leileta mi tur buh chi kûi, ṭiak tirte pawh tam tham tak a chîm pil a ni.
Inrinni tlai dar 4:30 vel khan NH-306 kawngpui chu Vairengte Kawngthar Veng Presbyterian biak-in bulah leiminin a hnawh ping a, mahse, Inrinni tlai vek khan lirthei kaltlang theihin siam tlang a ni. 
Serchhip district-a Hriang­tlang khua panna kawnga lui pakhata hume pipe phûm chu tuilianin a tichhia a, he thu ziah lai thleng hian Hriangtlang khua kal pawh theih a la ni lo.
Thenzawlah pawh ruahsurin chhiatna tênau a thlen a, khaw chhung hmun hniam lai eng emaw zat chu Lau lui lianin a chîm a, tuilianin a chîm chenna in pakhat chu riah chhuahsan a ni. Thenzawlah hian ruah a sur tam chuan khaw chhung kual chhuaka luang Lau lui lianin khaw chhunga kawngpui leh in eng emaw zat a chim ṭhin a, khaw chhunga tui lenna laite chu siamṭhat ni tawh mah se, hmun hniam laia in ṭhenkhatte chu a la chim thei a ni. 
Nimin khan Thenzawl Field Venga zirlai awmna hostel pakhat chu tuilianin a chîm a; Thenzawl Tualvungi Venga Vanlalzapi in chu chîm bawkin, bungruate senghawi a ni a, in neitute an riak chhuak bawk.
Thiltlang leh Pangzawl inkar National Highway kawngpui, Thiltlang aṭanga km. 3 vela hláah kawng chhak aṭangin lei a min a, metre 30 vela zau a awh a, he thu ziah lai hi chuan kawngah lirthei a tlan tlang thei thung.
Hnahthial leh Tuipui-D inkar BRTF Road-ah pawh Tuipui péng aṭanga hla vak loah ABCI lei laina vûng tawlhin lungrem a tihchim bakah, kawngpuiah chirhdiak a inchhêk nasa hle. Tuipui-D khawtlang hruaitute'n hma la nghalin, ABCI excavator hmangin kawng thenfai hna thawh a ni a, nizan khan thenfai zawh hman beisei a ni.