Khelo India-a telte chawimawina hlân

Sports & Youth Services minister Robert Romawia Royte chuan June 17, 2022 khan SYS conference hall-ah Khelo India Youth Games-a tel infiammite hnenah chawimawi a hlân. Minister chuan, Aizawl Smart City hnuaiah Aizawlah khelmual pasarih, AIFF pawm ang siam turin tender chhuah mek a nih thu a sawi.

June 4-13, 2022 chhunga Haryana khawpui Panchkula-a Khelo India Youth Games neihah Mizoram aṭangin infiamna chi 10-ah infiammi 59 an tel a, gold medal pahnih, silver medal leh bronze medal pakhat ve ve an la a ni.

Medal late lawmna inkhawmah Robert Romawia Royte chuan, Khelo India Youth Games-ah Mizoram aiawha telte'n medal pali an hâwn chu lawmawm a tih thu sawiin, "Games-a tel thei nih ringawt pawh inchhuanna tham a ni a, tel hi thil awlái lo tak a ni. Medal late hi sport incentive hnuaia gold medal late Rs 1,00,000 ṭheuh (football-a gold medal mimal tin huamin), silver medal la Rs 70,000 leh bronze medal la Rs 50,000 pek an ni dawn," a ti a; medal lakna event-a coach-te pawh National Incentive Scheme-in a phal angin lawmman pek an nih dawn thu a sawi.

SYS Minister chuan, Aizawlah football khelmual indaih lohna phuhru turin Aizawl Smart City hnuaiah khelmual pasarih, AIFF pawm ang siam turin tender chhuah mek a nih thu a sawi a; National School Games atan sports school pathum - Mamit, Zobawk Lunglei leh Lawngtlaiahte cheng nuai 3,400 ṭheuh sênga sak mek chu nakkumah ṭan theih beisei a nih thu a sawi bawk.