MNF sorkar hotute hi an chêt chhiatna thup tuma dâwt sawi hreh miah lo an ni - MPCC Media

Mizoram Pradesh Congress Committee (MPCC) Media department hruaitute chuan, Mizoram State Health Care Scheme (MSHCS) chungchangah MNF sorkar hotute chu an chêt chhiatna thup tuma dâwt sawi hreh miah lo an nih thu an sawi a; Congress sorkar laia kum 2018 chhung bikah MSHCS-ah cheng nuai 539.46 dah a nih thu an sawi bawk.

MPCC Media department hotute chuan June 18, Inrinni khan Aizawl Press Club-ah thuthar thehdarhtute kâwmin, MSHCS-a sum dah chungchang an sawifiah a; an chairman Dr Lallianchhunga chuan, "MSHCS chungchang hi a changtu Minister leh Chief Minister-in an ngaihthah em avangin damlo bill bá cheng nuai 7,100 chuang a awm phah a ni," a ti.

Dr Lallianchhunga sawi danin, health care scheme chu MNF sorkarin phuailuai taka an kalpui avang leh mimal hlawkna atan an hman avangin December 2008-a Congress sorkar hnuah a kalphung siam ṭhat chhung a rei a; March 30, 2010 aṭangin corpus fund (sum báwmpui) siamin, Asian Development Bank (ADB) aṭanga sum hmuh vbc. 117.80 leh a tira sum dah vbc. 50 aṭanga an hman bâng, a vaiin cheng vbc. 149.6-in bul ṭan ṭhat a ni.

Corpus fund-a sum awm vbc. 149.6 bakah Congress sorkarin kum 2018-19 chhungin cheng nuai 539.46 an dah tih sawiin Lallianchhunga chuan, "Congress ministry-in MSHCS-a sum a dah hi kum 2019-20 budget pharh ruala pharh ve Supplementary Demand 2018-19 ah chiang takin a lang a, budget pharhtu CM Pu Zoramthanga’n hei hi a hre lo a nih chuan Mizoram sum leh pai dinhmun a hre chiang lo hle tihna a ni a, a pawi tak zet," a ti.

RTI Act hmanga zawhna Finance department-in an chhàn danin, Congress sorkar lai, kum 2018-19 chhunga MSHCS-a sum dah belh dan chu: