Kawng laih vanga harsatna thleng ngaihthahah ZLP-in sorkar an puh

ZPM Legislature Party (ZLP) chuan, National Highway Infrastructure Development Corporation Limited (NHIDCL)-in Mizoram hmun hrang hranga kawng an laihna leivûngin mipui leh environment tan harsatna a thlen nasat viau tawh laia Mizoram sorkar a ngawi tlat chu hriatthiam harsa an tih thu an tarlang.

ZLP hian June 18, Inrinni khan press statement siamin, NHIDCL kawng laihna vûngin mipui leh nungchate tan harsatna a thlen nasa chu an ngai thutak tih an tarlang a, "NHIDCL kawng siam mek hi kan sorkarin a vilpui uluk loh avangin kan ram tuihna, lui tui, nungcha, thing leh mauin an tuar nasa em em a, chenna in chán hial pawh kan awm tain a lang. Mizoram mipuiin ngaimawhin, tun hnaiah pawl hrang hrangin an duh lohzia an au chhuahpui mek laia Mizoram sorkarin ngawih a chuh tlat hi hriatthiam a harsa hle," an ti.

Ram hmasawnna a hlut rualin, hmasawnna hnathawhte'n ram chhunga chêng mihring, nungcha, thing leh maute tana harsatna a siam te, ram leh hnam himna tiderthawng thei a nih dante ngaihtuah hmasak a ṭul thu sawiin ZLP chuan, sorkarin uluk taka a enpui a, hmasawnna hnathawhin ram leilung a tihchhiat loh dan turah ngaihtuahna nasa zawk a sên a ṭul thu an tarlang.

(Phek 2-ah zawm a ni)