KHAWTHLIR
Thisen pe
June 18, Inrinni khan Chanmari West Branch YMA chuan YMA Day pualin Civil Hospital, Aizawl tan thisen unit 127 an pe a, petute mipa 110 leh hmeichhia 17 an ni. KṬP, Zemabawk North Bial-in Synod Hospital tan thisen unit 64 an pe, petute mipa 59 leh hmeichhia panga an ni a; KṬP, Bilkhawthlir Hmarveng Bial pawhin Kolasib District Hospital tan unit 64 an pe a, petute mipa 46 leh hmeichhia 18 an ni. Lawngtlaia Zion unit ṬKP member mipa 14 leh hmeichhia parukte pawhin District Hospital tan thisen unit 20 an pe bawk.
Sikul sak belh
Aizawl South-II bialtu MLA Lalchhuanthanga chuan a MLA fund hmanga Salem Veng Primary School building sak belh thar chu June 18, Inrinni khan a hawng. Salem Veng P/S hi a têt avang leh zirlai an tâwt avangin ft. 36X12-a zauin sak belh a ni.
Tuikhur hawng
Venghlui chuàn hnuai lama 'Lamhnai' area châwmtu tur Aizawl Zero point tuikhur chu June 18, Inrinni khan Aizawl mayor Lalrinenga Sailo-in a hawng. Tuikhur siamna leh senso ṭul zawng zawng atan bialtu councillor David Zohmangaiha hmalaknain Ward-XVII tied fund hman a ni. Lalrinenga Sailo chuan, AMC chuan tuihna leh lui humhalh kawngah hmalak zel a tum tih a sawi a, deputy mayor R Thanglura pawhin, AMC budget zinga 30% chu tui humhalh leh tihpunna kaihhnawih atan hman a ni dawn tih a sawi bawk.
Minister-in hmanpui
Sairang Higher Secondary School chuan June 17, 2022 khan Sairang Hall-ah kumina HSSLC exam-a an tih ṭhat lawmna an buatsaih a, minister of state Robert Romawia Royte leh bialtu MLA Zothantluanga ten an hmanpui. Minister chuan, Sairang khawtlangin an mamawh avanga sum thawh khawma football field tur an leiah sorkarin field changtlung tak laih dan a ngaihtuahpui dawn tih a sawi.
Chawimawina hlân
Mizoram Arm Wrestling Association chuan June 18, Inrinni khan Vaivakawn Auditorium-ah bán inelh intihsiaknaa lawmman late chawimawina an buatsaih a, Home minister Lalchamliana'n a hmanpui. Gold medal la mi 15 leh silver medal la mi pariat hnenah chawimawina a hlan a ni.
Dawr rawktu man
Lunglei police-te chuan June 18, Inrinni khan Lunglei Ramthar Venga workshop rawktu Lallawmkima (30) s/o Thanngaia, Lunglei Ramthar Veng an man a, a thil rûk aṭanga Rs 23,000-a a lei mobile phone leh Rs 36,000 an hmu lêt. Lallawmkima hi jail-ah an dah nghal a ni.
In 2 kâng ral
June 18, Inrinni zing kar khan Aizawl district- Kepran khuaah Lalkhuma in leh Lalsipaia in a kâng a, bungrua chuh hman lohin a kang ral a, Zothansanga in tlem a kâng bawk. Kangmei chhuakah hian thi leh hliam an awm lo a ni.