ADB loan pûk tur MNF-in ropui an ti

MNF party chuan thuchhuah siamin, Mizoram sorkarin Asian Development Bank (ADB) aṭanga loan a la thei tur chu ropui an tih thu an tarlang.

Chief minister Zoramthanga leh Health minister Dr R Lalthangliana te hmalakna avangin Mizoram sorkarin ADB loan, sum tam tham tak a la thei dawn nia sawiin MNF chuan, "Ropui kan tiin kan chhuang tak zet. Eptu party ṭhenkhatten thu dik lo hmanga mipui rilru hruai kawi tumin, ‘Bang chhak sahthlaka bang thlang pin nana hman,’ tia sawi hnawmna tur an zawng hi ṭha kan ti lo," an ti.

MNF tarlan danin, Mizoram State Health Care Scheme (MSHCS) tihchangtlun zelna atan Mizoram sorkarin ADB loan cheng vbc. 1004.70 la tura a bawhzuina chu Screening Committee (Union Finance Ministry) chuan a pawm tawh. Loan funding agency - ADB chuan cheng vbc. 803.76 (80%) a pe ang a, a bak cheng vbc. 200.94 (20%) chu Mizoram sorkar tum tur a ni.

ADB aṭanga loan pûk tur cheng vbc. 803.76 chu External Aided Project (EAP) hnuaia kal tur a ni a, EAP guidelines angin sorkar laipuiin 90% a rûl ang a, Mizoram sorkarin 10% a rûl thung dawn. Hei vang hian Mizoram sorkarin ADB loan a pûk tur zat chu cheng vbc. 80.3 chiah a nih thu te, loan punna chu kum khatah 2% vel ni tura ngaih a ni thu leh, kum 15 vel chhunga rulh tur a nih thu MNF chuan an tarlang.

MNF party chuan, EAP hnuaiah ADB loan puk turin harsatna tam tak paltlang a nih thu tarlangin, "A tirah DoNER-in a hnâwl a, Department of Expenditure, Ministry of Finance-in a hnâwl leh. Kan CM leh Health Minister hmalaknain Department of Economic Affairs, Ministry of Finance dawr leh a ni a, theihtawpa beih zui a nih hnuah Screening Committee chuan a pawm thei ta a ni," an ti.

EAP chu tun hma chuan sorkar laipuiin a rulhsak vek ṭhin tih sawiin MNF chuan, "Mahse, loan pûktu state sorkarin 10% chu a pung sang tak, kum khat 6% - 7% velin central sorkarah an rûl ṭhin thung," an ti a; tunah erawh chuan sorkar laipuiin 90% leh state-in 10% an tum tih sawiin, a punna pawh 1.5% - 2.5% vel chauh a nih thu an tarlang.

MNF chuan, ADB sum pûk tur chu MSHCS corpus fund-a dah tur a nih thu tarlangin, "Mizoram healthcare bill-te chu corpus fund peipunna pung (interest) aṭanga pek ṭhin a ni. Tun dinhmunah hian corpus fund cheng vbc. 205.67 a la awm mek a, ADB loan tihfel hunah chuan cheng vbc 1210.37 awm tura beisei a ni a, MSHCS tluang takin a kal chho thei dawn a ni," an ti.