Aizawl district-ah hripui vei an pung

Mizoramah Covid-19 vei June 17, Zirtawpni khan mi 17 leh June 18, Inrinni khan mi 27 hmuh chhuah a ni a, Aizawl district-ah hripui vei an pung tial tial. Inrinni leh nimin khan hripui vei dam tawh mi 36 chhuahtir an ni a, hripui vanga thi an awm lo.

June 17-a Covid-19 vei hmuh chhuahte chu mipa pakua leh hmeichhia pariat an ni a, ZMC RT-PCR laboratory-a hmuh chhuah mi pakhat leh RAT hmanga hmuh mi 16 niin, positivity rate 10.63% a tling.

Inrinnia hripui vei hmuh thar mi 27-te chu mipa 15 leh hmeichhia 12 an ni a, ZMC laboratory-a hmuh chhuah mi pahnih leh RAT hmanga hmuh mi 25 niin, positivity rate 9.47% a ni.

Covid-19 vei zinga dam tawh mi 14 chu nimin khan chhuahtir an ni a, Inrinni khan mi 22 chhuahtir an ni bawk.

Mizoramah a záwnin ni sarih chhung hripui vanga thi an awm tawh lo a, June thla bikah mi pathum an thi tawh. Thi an awm hnuhnun ber ṭum chu June 12, 2022 a ni.

IDSP record angin, Mizoramah Covid-19 vei 2,28,731 hmuh chhuah a ni tawh a, mipa 1,06,492 leh hmeichhia 1,22,239 an ni a, mipa aiin hmeichhia 15,747-in an tam zawk. Nimin tlai dar 5 thleng khan mi 2,27,889 (99.63%) chhuahtir an ni tawh a, mi 701 (0.31%) thi tawhin, enkawl mek mi 141 (0.06%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pali - Siaha, Serchhip, Lawngtlai leh Hnahthial district-te a awm a; Aizawl district-ah Covid posityive an pung tial tial a, mi 70 an awm mek. Kolasib district-ah mi 27 leh Mamit district-ah mi 21 an awm mek bawk.