Inbuatsaih na chang hre loah PC-in Mizoram sorkar an puh

Peoples' Conference party chuan thuchhuah siamin, fûr laia harsatna thleng thei laka inbuatsaih nachang hre lo sorkar Mizoramin a nei chu thanatthlak an tih thu an tarlang.

PC party chuan, "Kum tin fûr ruahsur avangin Zoram chhung leh páwn aṭangin tuilian, leimin, kawng chhiate'n ei leh bâr leh châkkhai phurh luhna kawngah harsatna kan tâwk ziah ṭhin tih hre reng chunga inbuatsaih lâwk tum nachang hre lo khawpa sorkar muthlu, ben harh chawp ngai Zoramin kan hrawn ṭhin hi thanatthlak kan ti tak zet," an ti.

Meghalaya state chhungah lei a min avangin Mizoramah tuialhthei phurh luh theih a nih rih loh thu sawiin PC chuan, "Mizoram puma petrol leh diesel khuahkhirhna tihchhuah ngai khawpa Mizoram sorkar a tâlbuai leh ta hian ram leh mipui ngaihsakna kawnga Mizoram sorkar inthlahdahzia leh inhmakhuana ṭha a neih lohzia a tilang chiang hleah kan ngai," an ti bawk.