LEIT Director hlui chhui a ni dawn ; Sorkarin a chhui zui tur a ruat ang

Labour Employment & Indus­trial Training (LEIT) director hlui Rotluanga chuan, sorkarin thil dik lo tia a puhna a pawm lo a, hei vang hian sorkarin a chhui chiang tur a ruat dawn.

Vanglaini palaiin Vigilance en­kawltu chief secretary Lalmal­sawma hnen aṭanga thu a dawn danin, Mizoram Building & Other Construction Welfare Board (MBOCWWB) sum hman dan leh kalpui a nih danah proceedings draw tur a ni a, LEIT Director hlui hnenah hian a thil tih dik loh nia hriatte (memorandum of charge) pek a ni.

Memorandum of charge hi Rotluanga hian a pawm a nih chuan chhui zui ngai lo tur a ni a, a pawm lo a nih erawh chuan chhui zui ngai a ni thung. Rotluanga hian a pawm loh avangin chhui zui a ni dawn. A chhui zui tur ruat a la ni lo a, ruat thuai tum a ni.

Chief Secretary chuan, commi­­ssioner of inquiry hlui K Lal­chhunga'n a chhui loh chhan chu MBOCWWB chhui tura tih a nih lai vel hian K Lalchhunga hi commissioner of inquiry a nih tawh loh thu a sawi a, "A hna chhunzawm leh tura tih a nih pawhin a kum lamte a upat deuh tawh avangin a phá a, chuvangin, ruat a ni tawh lo," a ti.

Political party leh pawl ṭhen­khatin an duh loh vanga K Lal­chhunga chu chhuitir ta lo an nih leh nih loh zawhna chu Lalmalsawma chuan, "Chu lam chu engmah ka hre lo," tiin a chhang.

Chief Secretary chuan, Mizoram sorkarin commissioner of inquiry a neih hrih loh chhan zawhna chhangin, he post chelh tur hi an zawng ṭhin a, mahse duh ang hmuh a la nih loh vang a nih thu a sawi.

Rotluanga hi NIAS Kolkata leh MBOCWWB ten MoU an ziah laiin Labour, Employment and Industrial (LEIT) director a ni a, LEIT Director a nihna angin MBOCWWB Secretary a ni nghal a; MoU-ah pawh MBOCWWB aiawhin hming a ziak a ni.

Mizoram sorkar chuan Ro­tluanga hi January 27, 2017 khan a suspend-a, hetihlai hian addl. secretary a ni. Suspend a nih chhungin thuneitu sang zawkte remtihna loa Aizawl chhuahsan lo tura tih a ni.