MJA Library hruaitute'n Assembly Library an tlawh

MJA Public Library hruaitute chuan nimin khan Mizoram Legislative Assembly Library an tlawh a, Library enkawltute nen an inkâwm. Assembly Library-ah hian lehkhabu 19,549 a awm mek a, mi pangain an enkawl mek.

MJA Library Sub-Committee hruaitute hian Assembly Library enkawltute chu an kalphung te, lehkhabu an enkawl dante leh an hriat duhte an zawt a; Assembly Library enkawltute'n zawhnate an hrilhfiah.

Zawhna chhangin Assembly Library enkawltute chuan, Assembly Library chu MLA zingah tlawh peih tak tak an awm laiin, tlawh khát deuhte pawh an awm tih an sawi a, MLA zingah MNF member Lalrinawma a kal ngun ber niin an sawi.

Hetih lai hian, MLA an nih laia lehkhabu hawhtu, tuna MLA ni tawh lo zingah lehkhabu hawh tun thlenga la pe lo an awm nual thu an sawi bawk.

Assembly Library enkawltute'n MJA member-te an hrilh danin, he Library hian lehkhabu 19,549 an neih mek zingah kum 1972-2016 chhunga Mizoram proceeding-te leh Mizoram Gazette te, kum 1922-1971 chhung (district council hun lai)-a Zoram Hriattirna (tuna Govt. Gazette tih hi district council hun laiin Zoram Hriattirna tih a ni) te, kum 1972-2017 chhunga Mizoram budget-te a tel.

India ram pum huap chanchinbu (newspaper) panga leh magazine 32, Mizorama ni tin chanchinbu 29 leh magazine 22 an la (subscribe) mek a; ṭum khatah lehkha chhiara mi 10 ṭhut theihna a awm a ni.