CSS Hindi zirtirtute thiam chan tum dan a dik tawk lo - CM Hawla

Chief minister Lal Thanhawla chuan, Mizorama CSS Hindi teacher-te chuan thu dik tawk lo hmangin thiam chan an tum niin a sawi a, "Ngawihbopui chi-ah ka ngai lo," a ti.

Chief Minister hian nimin khan Congress Bhavan-ah thu sawiin, "Hindi zirtirtute'n CM bangla kawta an kal chhan an chhuanlamah, an ṭhianpa pakhat damloh thuah CM biak an tum thu an sawi a ni," a ti a; Chief Minister biak an duh thu hi bangla-a duty-te leh CM bangla compound-a awm a Additional PS pawhin an hriat loh thu a sawi.

CM bangla kawta an luh hmain Hindi zirtirtute chu an aurual tih sawiin CM Hawla chuan, "Kan hriat theih chinah chuan, he sorkar hian a theihnghilh ngai tawh loh tur thil hriattir an tum thuin an aurual a ni. Ka nupui fanaute'n police-te chu an hmanrua hmang lo tur leh thisen far khat mah chhuah lo tura an ngen avangin an tum ang a thleng ta lo," a ti.

Lal Thanhawla chuan, CSS Hindi zirtirtute'n Aizawl SP zu rûia an puh thu sawiin, "Buaina chhuah zan khan kan inah police hotute an lo kal a ni. Bangla chhungah kan inkâwm khawm a, Aizawl SP hi ka bul hnaia ṭhu a ni a, zu rûi hmel a pu lo," a ti.

Zoram mipuite laka thiam an chan tumnaah Hindi zirtirtute chuan thu dik tawk lo an sawi nia sawiin CM Hawla chuan, "Thiam chan an tumna hi ngawihbopui chi-ah ka ngai lo. Thu dikin ka chháng a ni," a ti.

Chief Minister chuan, sorkar laipui aṭanga CSS Hindi zirtirtu rawihin nghawng a neih dan an zir chiang tih Hindi zirtirtute'n an hriat loh thu an sawi chungchangah, "Surprise visit a ni a, an hre lo ang," a ti a; sorkar laipui aṭang hian endiktu tur an rawn kal leh dawn tih a sawi bawk.