World Health Day pualin hun hmang

Nimin April 7 kha World Health Day a ni a, thu­pui 'Depression, Lets Talk' tih niin, Mizoramah pawh hman a ni.

Aizawlah chuan Health department-a Mass Education & Media Section bultumin nimin khan Health principal director Dr F Lallianhlira pisaah World Health Day hman a ni a; Lungleiah chuan PK Middle School, Chanmari-ah hman a ni.

World Health Day hmannaah hian Health Services director Dr Lalchungnunga'n thupui a sawi a; India ram mihring zinga 4.5%-in depression vangin harsatna an tawh thu te, khawvelah mi nuai 3,500 velin depression an vei thu te, depression neingah kum 15-20 inkar an tam zual thute a sawi. Dr Robert L Khawlhring-in thupui hi a sawi bawk.

World Health Day hi Lungleiah chuan SSA Mission leh Lunglei CMO pisa huaihawtin PK Middle School-ah hman a ni a, SSA Mission hnuaia thawk te, zirtirtute leh zirlaite an tel. Resource person Dr Lalawmpuia Chhangte, Lunglei Civil Hospital-a senior medical officer-in thupui a sawi.

World Health Day hi kum 1948-a UNO hnuaia World Health Organisation (WHO) Assembly-in a pawm angin, April 7, 1950 aṭangin kum tin khawvel hmun hrang hrangah hman ṭhin a ni a, hriselna pawimawhzia inzirtirna atan hman ṭhin a ni.