CM thu angin kuminah duh hun hunah Lo a hâl theih niin AMFU-in an tarlang
All Mizoram farmers Union (AMFU) hruaitute chuan, kuminah ruahtui a tlak hma avangin lo neitute'n lo hal kawngah harsatna an tâwk nasa tih sawiin, chief minister Lal Thanhawla thu angin, kumin bikah lo neitute'n an duh hun hunah lo an hâl thei niin an sawi.
AMFU hruaitute hian nimin khan Aizawl Press Club-ah thuthar thehdarhtute an kawm a; tun hnaia Chief Minister an hmuhnaah kumina lo hâl kawnga lo neitute harsatna chungchang an sawipui tih sawiin, "Lo hâl hun pawtsei leh turin sorkar kan ngen a. Chief Minister chuan, 'Kumin 2017 atan lo hâl hun bituk loin khua a ṭhat a, kut hnathawktute'n an hâl theih hun hunah hâltir tur' a ti a, he thu hi sorkar hotute hriattir nghal an ni," an ti.
Hemi chungchangah hian zawhna chhangin AMFU hruaitute chuan, DC-te'n an district chhunga lo hâl hun hnuhnung an lo chhuah tawh chu tihdanglam tura an ngaih thu leh nimin khan DC-te'n order thar an chhuah an rin thu an sawi a; lo hâl tur la neite chu mahni remchan dan anga lungmuang taka an remchan hun huna hâl tur leh ram tikang lo zawnga hâl turin an ngen a ni.
AMFU general secretary Zion Lalremruata chuan, Mizorama kut hnathawktute'n an thawh chhuah aṭanga hlâwkna tam zawk an neih theih nan ram chhung leh páwna hralhna turin Regulated Market System hman ṭha an tih thu a sawi a, "Agriculture Produce Marketing Committee Act (kum 2003 model) zûlzuia kum 2008-a APMC Act siam tawh ennawn a, Rules siamṭha turin Commerce & Industries Secretary ruat a ni a, thla hnih chhunga peih hman tura tih an ni," a ti.
Tun hnai kum 2/3 aṭanga sawhthing man a tlakhniam vanga lo neitute'n sawhthing an hralh theih loh chungchangah Zion Lalremruata chuan, Mizoram páwn hmun hrang hrangah sawhthing hralh theih dan tur an zir tawh a, sorkarah rawtna an thlen tawh thu a sawi.
AMFU GS sawi danin, tunah hian Mizoramah a tlem berah sawhthing quintal 4,00,000 tal a awm an ring a, mahse, hralh maina tur a awm lo. Market chhiat chhan ber chu - sawhthing leitu ber Bangladesh market chu China leh Myanmar lama mite'n tláwm zawka an pek theih vang a ni. India ramah Maharashthra, Andra Pradesh, Chhatisgarh leh Uttaranchal-te'n sawhthing an thar tam vang a ni bawk.
Sawhthing market chhe viau rih mah se, tuna sawhthing neite'n an hralh theih nan Chief Minister hnenah a phurhna man tumsak (transport subsidy) turin an ngen a, Chief Minister pawhin lo en zui a tum thu a sawi tih an sawi.
AMFU hruaitute chuan, February 13, 2017 khan Land Reform Amendment siam turin sorkarah memorandum an thehlut tih sawiin, Mizoramah ramte chu sumdawn nan leh dik lo taka zangnadawm nan hman a nih ṭhin tihtawp nan te, mi hausate kutah ram a luh zel loh nante sorkarah rawtna hrang hrang an thlen tih an tarlang.
AMFU rawtnate
1. Land Ceiling Act siam
2. Ram neitu nihna (ownership) pek thuai thuai loh leh miin a ram a hman ṭangkai phawt chuan chhiah (land revenue) tihtlemsak.
3. Ram neituin a ram a hman ṭangkai loh a, thil thar chhuahna atana a hman loh chuan chhiah sang tak lak.