KHAWTHLIR

Award dawng turin thlang
North Eastern Council (NEC) leh Sreemanta Shankar Mission of Guwahati ṭangkawp chuan, vawiin hian Guwahati-ah 'Vasundhara - NE Entrepreneur of the Year' (2014-15) Award' an sem dawn a, Mizoram aṭangin Zoramchhani Ralte chu he award hnuaia hmarchhak hmeichhiate tan bika buatsaih 'Vasundhara - NE Woman Enterpreneur of the Year Award' dawng tura thlan a ni.

YMA inkhawmpui
Vanva Group YMA chuan April 4-6, 2017 chhung khan Mausen community hall-ah group conference an hmang a, Nilaini zan khan minister PC Lalthanliana'n a hmanpui. PC Lalthanliana chuan, kohhran leh political party hrangte awm mah se, YMA-ah chuan pawl zawng zawng an len thu a sawi. Vanva Group YMA-ah hian YMA branch 11 an awm a ni.

Thisen pe
J Thankima College NSS Unit, Red Ribon Club leh IQAC-te chuan nimin khan an college campus-ah blood donation camp an huaihawt a, Aizawl Civil Hospital tan mipa 90 leh hmeichhia 20-te'n thisen unit 110 an pe.

Mizo nun zirho
Mizoram Psychology Association (MPA) leh Mizoram University-a School of Social Sciences chuan, nimin khan IPR directorate auditorium-ah ‘Role and status of Women in Mizo Society; Past and Present’ tih thupui hmangin seminar an buatsaih a; Mizo Academy of Letters vice president C Chhuanvawra thuziak an zirho a ni.

Sikul hawng
Mualkhang RMSA High School chu nimin khan bialtu MLA Hmingdailova Khiangte, parliamentary secretary-in a hawng. Mualkhang khua hian mipui thawh khawm hmangin February 11, 2011 khan private high school an din a, sorkarin RMSA H/S-ah a hlangkai tawh a, headmaster leh zirtirtu pali an awm mek a ni.