IFAD team-in Chief Minister an kâwm
United Nations (UNO) agency pakhat, International Fund for Agriculture Development (IFAD) palaite chuan country representative Rasha Omar hoin Nilaini tlai khan chief minister Lal Thanhawla a chenna bangla-ah an kâwm a, Mizorama hmalak an tum dan an sawipui.
Chief Minister chuan, IFAD-in Mizoram leh Nagaland-ahte hlâwk zawk leh boruak tichhe lo zawnga tlangram lo neih dan enkawlna ṭha zawk duanga hmalak an tum chu lawmawm a tih thu a sawi a; IFAD palaite chu tih tur la awmte a rang thei ang bera tihfelsak tura ngenin, "He project hi Mizoram sorkar leh lo neitute'n an nghakhlel hle a ni," a ti.
IFAD team hi project design team an ni a; project-in a huam tur district pali – Champhai, Mamit, Kolasib leh Serchhip district-te an tlawh dawn bakah, thil ṭul dangte tiin Mizoramah chawlhkar hnih chhung hun an hmang ang.
Project hi kum 6 daih tur a ni a, tlangram lo neih dan kalphungte zirin, lo neitute hlâwkna leh hamṭhatna hrang hrangte an ngaihtuah dawn a ni.
IFAD team hian Nilaini vek khan sorkar offcial-te chief secretary Lalmalsawma hoin Secretariat conference hall-ah an kâwm a, thil pawimawh hrang hrang an sawipui.
IFAD team hian nimin khan tlangram kut hnathawka eizawngte dinhmun zir turin Zanlawn khua an tlawh a, khawtlang hruaitute nen an inkâwm.
Zanlawn khawtlang hruaitute chuan, an ei leh bar zawn dan tlangpui te, lo an neih dan leh huan an siam dan te, an harsatna leh mamawhte an lo hrilh a ni.