Rinawm leh taima taka thawkte sorkarin A ensawn dawn lo - Horticulture Minister

NABARD leh NEIDA-te'n an buatsaih, Tribal Development Project chu nimin khan Mualṭhuam North-ah bialtu MLA PC Lalthanliana, minister-in a hawng. Minister chuan, sorkarin taima leh rinawm taka thawkte a ensawn dawn loh thu a sawi.

Horticulture Minister chuan, hamṭhatna beisei vanga tui zawng thlâk fo chu sim a ngaih thu sawiin, "Sorkar chuan taima leh rinawm taka thawktute chu a ensan dawn lo. Kan chana kan lawm thiam a, tih tak taka kan kal hi kan hlawh­tlinna bul a ni," a ti.

NABARD leh NEIDA-te'n Mizoram tan nasa takin hna an thawh thu sawiin PC Lalthanliana chuan, "Min duhsakna ang hian puih zel tlak kan nih leh nih loh hi keimahni mawh a ni," tiin mipuite a hrilh.

NARBARD general manager DK Mishra leh NEIDA executive director Dharani Ratno ten Mizoram hmasawnna atana an hmalakna hrang hrangte an sawi bawk.

Tribal Development Project hnuaiah hian Lunglei RD Block huam chhungah project pahnih ruahman a ni a, project pakhatin khaw pangaah chhungkaw 250 zel a tuam dawn a ni.

Kum ruk chhung kalpui tur a ni a, phase 1-ah chhungkaw 100 leh phase 2-ah chhungkaw 150-te'n ṭanpuina an dawng ang. Ṭanpuina dawngtu chhungkaw tinte chu vawk-in saksak an ni ang a, serthlum phun tur kûng 110 ṭheuh leh balhla phun tur 60 ṭheuh pek an ni bawk dawn a ni.

Project pakhat zel atan hian NABARD-in cheng nuai 123.64 leh NEIDA-in cheng nuai 83 an tum dawn a, benificiary-te'n cheng nuai 63.64 hû tha an thawh thung ang.