Baptist House sakna tur hmun dang ngaihtuahpui turin BCM-in CM ngen

Baptist Church of Mizoram (BCM) hruaitute chuan April 6, 2017 tlai khan chief minister Lal Thanhawla chu a banglaah an hmu a, MG Road-a lei tlahniam vanga Baptist House-a awmte insawn chhuahtir an nih chung­chang sawipuiin, Aizawla Baptist House sak lehna tur hmun dang ngaihtuahpui turin an ngen.

BCM hruaitute chuan, Baptist House chu hlauhthawnawma a awm avangin Aizawl DC thupek angin April 3-ah an chhuahsan thu Chief Minister an hrilh a; chhiatna thleng chu tu'ma beisei leh duh dan a ni lo a, vanduainaa an ngaih thu an sawi.

Chief Minister chuan, vanduaina vanga Baptist House leh a bul hnaia awmte'n harsatna an tawk chu ama mimal leh sor­karin pawi an tih thu a sawi a; vanduaina thleng chu sorkarin a ngai pawimawh a, a hmunah pawh thu­neitute'n an en fo thu sawiin, an harsatna tawh chu sorkar hotu dangte a lo sawipui tur thu a hrilh.

BCM hruaitu, Chief Minister hmutute hi BCM president Rev. H Lianngaia, general secretary Rev. F Ramdinmawia, executive secretary Rev. Dr K Lalrinthanga leh hruaitu dangte an ni a; parliamentary secretary Joseph Lalhimpuia'n a ṭawiawm a ni.