Larsapin award dawngte certificate a hlân

Mizoram Bharat Scouts & Guides member zinga Rajya Purushkar Award dawngte chu, nimin khan Governor Lt.Gen. Nirbhay Sharma-a'n Raj Bhavan-ah certificate a hlân.

Certificate hlan inkhawm hi Mizoram Bharat Scouts & Guides state commissioner Zothanmawia'n a kaihruai a; Larsap chuan, award dawngtu zawng zawngte chu Mizoram leh India ram tihmingṭhatu leh ram tana chhawrtlak an nih ngei theihna atan duhsakna a hlan a ni.

Governor chuan, ram hruaitu hmasa eng emaw zat, Pandit Jawarharlal Nehru leh Maulana Azad-te pawh scout an ni ve ṭhin tih sawiin, "Naupang leh ṭhalaite chher nan kum tam tak chhung chu he pawl hlun leh ropui tak hi ṭangkai hle a ni," a ti a; Mizo ṭhalaite chu mahni inrintawkna nei chunga khawvel zau zâwka dâk chhuak ngam tur leh ṭawng dang pawh thiam belh turin a chah.

Rajya Purushkar Award hi scouts 42 leh guides 48-in an dawng a; Mizoram aṭangin he award dawng tawh zawng zawng chu scouts 168 leh guides 288 an ni.