Khatla MG Road-a lei chê enfiah a ni

UDPA secretary Dr C Vanlalramsanga hoin nimin khan sorkar official-te'n MG Road, Khatlaa lei chêtna hmun an tlawh a, harsatna lian zawk a thlen lohna turin hmalak dan tur an enfiah.

Dr C Vanlalramsanga chuan, Aizawl Convention Centre sakna tur hmuna khuarel vanduaina thleng chu sorkarin pawi a tih thu a sawi a, "Chhiatna thleng zel tur venna turin sorkarin hma a la mek a ni," a ti.

Sorkar thuchhuah tarlan danin, lei chêt vanga ṭhiah ngai, Bible House ṭhiah hna chu chawlh awm loa thawh mek a ni a, vawiin aṭangin Bible House hnuai aṭanga BSNL office hnuaiah gabion wall siam a ni ang. Lei tlahniam zel tur vênna turin micro piles dah tum a ni a, chuta tan chuan sorkarin private construction firm a ruai dawn a ni.

Aizawl Convention Centre sak a nih hmain a sakna tur hmuna lei awm dan zir chian hmasak a ni a, Geology & Mineral Resources department zirchhianna angin he lai hmun hi Low Hazard Zone-a dah a nih avangin lei laih hna pawh thawh ṭan a ni.

Tun kar tìra ruahsur nasa vanga lei a tlakhniam belh zel avangin Baptist House-a cheng chhungkuate chu insawn chhuak tura tih an ni a; sorkarin zangnadawmna a pek theih nan hmalak mek a ni.