Mizoram pum huap inelna K. Kawla Memorial U19 Football

Mizoram chhunga district pariatte football hmanga inelna K. Kawla Memorial U19 Football Tournament chu Ministry of Home Affairs ruahmannain Assam Rifles-in Mizoram Football Association nena ṭangkawpin a buatsaih dawn. Inelna hi May 1, 2017 aṭangin Lammual leh RG Stadium-a khelh ṭan tur a ni.

Goalkeeper thiam hmingthang K. Kawla hming chawia inelna hi mipa leh hmeichhe tana buatsaih tur niin January 1, 1999 leh a hnu lama lama piang chin tan tel theih a ni. Naupang kum hi uluk taka endik tur a nih avangin kum dik lo chu tel loh law law tur a ni.

K. Kawla Football-a tel tur hian MFA chuan an hnuaia District FA pariatte chu mipa leh hmeichhe team ṭha thei ang ber tir turin a hriattir tawh a, May thla chhungin Aizawlah kum Under 19 hnuai lam inelna hmuhnawm tak en tur a awm dawn tihna a ni.

Assam Rifles hian team tin hi track suit leh T Shirt a pek vek dawn bakah kalna seson, thlenna leh ei leh in a tum sak ang. MFA-in district te in sensona awm thei phuhruk nan jersey (kawr & kekawr) a tum sak ve thung ang. Champion-in Rs 50,000 pahnihnain Rs 30,000 an dawng ang a, fair play lawmman atan Rs 20,000 dah a ni bawk.

Inelna hi India ram puma junior footballer ṭha zawnna anga ngaih theih a ni. Mizoram aṭanga a ṭha thlan chhuahte chu team khatah dah an ni ang a, May thla tawpah Shillong-ah North East Round khelin chuta a tiṭhate chuan National Round an khel dawn a ni.

Hei mai hi a ni lo, inelna hi India Junior team kalkawng ṭha tak a nih theih bakah sipai lamin army football team-a lut tur player ṭha thlanna atan an lo hmang ve bawk ang.