Anti Drugs Awareness Campaign khar ; Mi tinin ruihhlo kan do a ṭul - Dy CM

Assam Rifles-te'n ruihhlo dona chungchang inzirtirna an buatsaih, Anti Drugs Awareness Campaign chu nimin khan Loch Hall, Assam Rifles hmunpuiah khâr a ni a; khuallian, deputy chief minister Tawnluia chuan, ruihhlo chu mi tinin an do a ṭul thu a sawi.

Deputy Chief Minister chuan, sorkar, kohhran leh pawl hrang hrangte bakah, Assam Rifles-te'n ṭhahnemngai taka ruihhlo donaa hma an lakna chu ropui a tih thu sawiin, "Ram hmél tibawlhhlawh thei leh mihring nunphung tibuai thei ruihhlo hi mi tinin kan do a ṭul a ni," a ti.

Dan loa ruihhlo zuar leh ruihhlo ngaite'n an sim theih nana thawkhoa inṭanpui a ngaih thu sawiin Tawnluia chuan, "Ruihhlo donaah sorkar, kohhran leh pawl hrang hrang bakah, AR-te'n an hmazawn ṭheuha ruihhlo do nan nasa taka hma an lakna hi tun aia nasa zawka kan kalpui a ngai a ni," a ti.

Anti Drugs Awareness Campaign hi June 7, 2022 khan hawn a ni a, chawlhkar hnih a awh a ni. Ruihhlo ṭhat lohzia inzirtirna atan Lunglei-Aizawl bike rally, lemziaka intih­siakna, Mimbung, Kàwlbêm, New Vaikhaw­tlang, Hnahlan, Champhai leh Siahaahte debate leh campaign neih a ni.

Campaign kharna inkhawmah hian ruihhlo ngaite ṭanpuinaa ṭhahnemngai taka thawktu Dr RL Sanghluna, Synod Hospital, Agape Centre director Zothanpuii leh, Mizoram Drug Users Forum president Lalduhawma Chawngthu-te hnenah chawimawina hlan a nih bakah, lemziak intihsiak lawmman sem a ni.

AR 23 Sector DIG Brig. Digvijay Singh chuan thusawiin Mizoram chu ram nuam tak ni mah se ruihhloin nasa taka a tihbuai thu leh, chumi do kawnga AR-te hnathawh a tarlang a, ruihhlo do tura ṭan lak a ṭul thu a sawi.

Khârna inkhawmah hian Synod moderator Dr Vanlalghaka Ralte pawhin thu sawiin Synod-in ruihhlo dona kawnga hna an thawhte a sawi lang.

He hunah hian 2 AR commandant Col. Rajesh Kumar Nayak leh officer dangte bakah Central YMA, MFA, MZP leh MSU hruaitute bakah sipai bang ṭhahnem tak an tel.